Na Galala Ni Digidigi

Na Kalou e tekitekivu ni veika kece. E vu mai vua na veika kece esa raica, tara, ka vakila. 

Na kaukauwa ni nona lewa kei na nona rawa ni bulia na veika mai na sega e kilikili kina me vakatokai me Kalou kaukauwa ka dina duadua ga.

Io e dua na ka uasivi cake e kilai tani kina na Kalou, a ya, ni kaya nai Vola Tabu ni sa loloma na Kalou. Ni da rai ena Lotu vakarisito, e usutu levu ni nodra veivakavuvuli na loloma ni Kalou ka tukunikataki enai Vola Tabu.

Sa davo oti toka na nona i tikotiko na Kalou mai lomalagi, ka sa nona nanuma me robota na veivanua lala ka wavoliti koya ena veibulibuli talei eso. Na veivuravura kei na veikalokalo era basika mai ena Nona kaukauwa. A buli ira na nona dauniveiqaravi ka ra vakatokai ena vosa vakatamata na agilose.

Na Kalou a solia e dua nai solisoli cecere vei ira eso na nona veika bula, aya na galala ni digidigi. Na kena vakadikevi ni i solisoli oqo ena vakararamataka na noda vakasama ena levu na kilaka titobu me baleta na loloma ni Kalou.

Na loloma e dabe toka ena vica na vakanananu titobu:

• Na kena soli na kaukauwa kei na galala meda vakatulewa vakai keda.
• Ke lailai sara, me rau lewe rua e rau dodoliga ena kena bucini na veilomani.
• E rau sega ruarua ni vakasaurarataki se coriti ena bukivere se veivakacalai me rau vakaio. E vu mai na loloma ena digidigi.

Na Kalou e bula galala, vaka tale ga kina ko ira na nona agilose, vata kei na tamata. 

Eda rai vei rau na veitamani mai lomalagi, e tu vei rau na galala me rau vakasega ena nodrau veidinadinati. O Jisu e sega ni gadrevi tamana me Bula vakataki koya. Io sa nodrau digidigi ga me rau tiko vata ka veilomani voli ga. 

Na Kalou a sega ni vakasaurarataki Lusefa me veivutuni mai na nona talaidredre, a solia vua na galala me digitaka na sala me muria, dina ga ni takosova e levu na laini na agilose totoka oya, ka vakavuna nai valu mai lomalagi, tini sara ena nona vakasavi tani mai keya kei ira na nonai lawalawa.

Na Kalou a sega tale ga ni vakasaurarataki Ivi kei Atama me rau kakua ni vakarorogo vua na gata. A solia vei rau na galala me rau digitaka na ka sala me rau na muria.

Me vaka na veilesoni eso, na loloma e dodonu me vulici. Na veika kece ka a vakatara na Kalou me yaco tarava ni sa oti na nona veibuli e nakiti me vakavulica vei keda na vakanananu titobu ni loloma ni Kalou.