Na Bibi ni Vola nei Taniela

  

A vakatakila e levu na ka na noda i Vakabula ena gauna a bula voli kina e vuravura. E dua vei ira oqo sai koya na kena bibi ni kena kilai na veika e vola ko Taniela ena nona i vola. Eda raica e vei na ka e tukuna qoka ko Jisu?

"Ia ni dou sa raica sa tu e na vale tabu na ka vakasisila sa dauveivakarusai, o koya sa vosa kina ko Taniela na parofita, (me kila mada ko koya sa wilika:) me qai se ki na veiulu-ni-vanua ko ira era sa tiko e Jutia." Maciu 24:15

Na Maciu wase 24 e dua na laini ni parofisai ka vakayatuyatutaka ko Jisu vei iratou na nona tisaipeli. Ni bera na nona vakaraitaka na veiparofisai oqo, a ratou a lako voli ena loma ni koro mai Jerusalemi ka ratou vakaraitaka tiko vua na tisaipeli na totoka ni vale ni soro. A sauma ko Jisu, "Dou sa raica na ka kecega oqo, ne? au sa kaya vakaidina vei kemudou, Ena sega ni vo tu eke na veivatu sa veitaqataqai, ena talaraki sobu kecega." Maciu 24:2

Ia ni sa tiko ko koya mai na ulu-ni-vanua ni veiolive, sa lako vuni vua ko ira na tisaipeli, ka kaya, "Ni tukuna mai vei keitou, se na yaco ninaica na veika oqo? Ia ka cava nai vakatakilakila ni nomuni lako mai, kei nai vakataotioti kei vuravura?" Maciu 24:3

Me sauma na taro oqo, a dolava ko Jisu e dua na laini ni parofisai bibi duadua enai Vola Tabu. Na Maciu wase 24 e vakamacalataki kina levu sara nai vakatakilakila ni sa voleka na nona lesu ko Jisu kei na vakataotioti kei vuravura. A tiki tiko ni veika oqo na nona tukuna me da kila na cava e tukuna ko Taniela ena nona vola me baleta na kena na basika ena loma ni vale tabu na ka vakasisila sa dauveivakarusai.

Me rawa vei keda meda kila se cava sara mada na ka vakasisili dau veivakarusai oqo, e dodonu me da vakamuria mai nai vola nei Taniela, tekivu mai na wase dua ka kauta sobu ki nai otioti ni wase. Na parofita oqo e vola sobu e vica na laini ni parofisai bibi ena nonai vola ka dodonu vei keda me da kila. Ke sega, eda na lako mataboko tu ena vuravura oqo.

Me baleta na parofisai, a kaya ko Pita ena nonai vola, "A sa tu talega vei keda na vosa sa vakadinadinataki vakalevu cake, a parofisai; ia dou na caka vinaka, kevaka dou sa vakananuma kina, me vaka ki na cina sa serau e na vanua sa butobuto, ka malua me kida mai na mataka, ka cabe mai ki na lomamudou na kalokalo i vola siga; ni dou sa kila taumada na ka oqo, ni sa sega na parofisai e nai Vola Tabu, sa vu e na kena kilai eliu na kenai balebale; ni sa sega ni vu na parofisai e na gauna eliu e na lewa ni tamata: sa vosa ga na tamata yalosavasava ni Kalou me vaka sa vakauti ira na Yalo Tabu." 2 Pita 1:19-21

Na parofisai e vaka tu e dua na cina ena vanua buto. E vakaraitaka vei na veika e yaco tiko vakawavolivoliti keda. Me vaka na cina ni lori ena vanua buto, eda na coqa ke boko. Ni da draiva tiko ni bogi, e cinava tiko na cina na veivakatakilakila ni gaunisala eso ka tiko e matada. Na parofisai e vaka kina, e vakaraitaka vei keda na veika e se bera ni yaco mai, ka vakatakila mai na veivakatakilakila ni gauna eso me tabaka na vakasaribariba ni noda bula.

Na bula ni lotu Vakarisito e bula ni vakavakarau. Eda na vakavakarau vakacava kevaka eda sega ni kila tiko na gauna kei na ka e vakarau yaco kina? Ena gauna nei Tevita, era kilai tani na mataqali i Isikari ni ra "...vuku e na ka ni gauna oqori, me ra kila na ka sa dodonu me ra kitaka ko ira na Isireli..." 1 Veigauna 12:32

Nai vola nei Taniela e vola ni parofisai ni veigauna  ena muri mai kei na veika ena yaco kina. E rua na kenai vakaraitaki vinaka na tadra nona na tui ko Nepukanesa ena Taniela wase rua, kei na nona raivotu ko Taniela ena wase vitu. 

O ira kece na veiparofisai oqo era mua kece tiko ena levu na veika lelevu era na yaco ena gauna mai muri, dua vei ira oqo sai koya na kena na basika ena loma ni vale tabu na ka vakasisila dau veivakarusai me vaka e kaya ko Jisu.

Oni sa raica qo na kena vakabibitaka ko Jisu na kena kilai na veika e volai tu ena i vola nei Taniela. Sa noqu masu ni oni na wilika, ka kerea na veivuke ni Yalo ni Kalou me vakatakilai mai na veika era vuni tu ena i vola totoka qo.

Meu tinia, na parofita ko Emosi e kaya, "E dina, ena sega ni vakayacora e dua na ka na Turaga ko Jiova, ena vakaraitaka mada ga na nona vosa vuni vei ira na nonai talatala na parofita." Emosi 3:7. Ni kalougata tiko.